ပၢႆးယူႇလီ

တၢင်းၵိၼ်ဢၼ်လီငိူင်ႉဝႄႈ တႃႇတၢင်းပဵၼ် ႁူဝ်ၶႆႈၽၢႆႇလဵဝ်
Details Created on Wednesday, 11 June 2014 22:04 Published Date Written by ယိင်းလွႆတွၼ်း

တၢင်းပဵၼ်ႁူဝ်ၶႆႈၽၢႆႇလဵဝ်ၼၼ်ႉ မီးၵူၼ်းပဵၼ်ၼမ်တႄႉတႄႉ ဢမ်ႇဝႃႈၽူႈယိင်းလႄႈၽူႈၸၢႆး  ႁူႉၸၵ်းတၢင်းပဵၼ် ၼႆႉတင်းၼမ်  ယွၼ်ႉဝႃႈမၼ်းပဵၼ်တၢင်းပဵၼ်ဢၼ်ႁဝ်းၵႆႉလႆႈငိၼ်းပိူၼ်ႈလၢတ်ႈၵၼ်မႃးၸဵမ်လဵၵ်ႉ။ မိူဝ်ႈႁဝ်း ၶႃႈၵေႃႉလဵၵ်ႉၼၼ်ႉ ၵႆႉလႆႈငိၼ်းၽူႈယႂ်ႇဢုပ်ႇၵၼ်ဝႃႈပဵၼ်တၢင်းပဵၼ်ႁူဝ်ၶႆႈၼႆႉ ၶၢၼ်ၸႂ်ၼႃႇ မၼ်းၸဵပ်းမၼ်းၸီး မိူၼ်မီးတူဝ်မႅင်းယူႇၼႂ်းႁူဝ်သေ ၶူပ်းသႂ်ႇၸီးသႂ်ႇဝႃႈၼၼ်။

ပေႃးထိုင်ၵၢပ်ႈမိူဝ်လဵဝ်မႃးႁဝ်းၸင်ႇႁူႉလႆႈဝႃႈမၼ်းၶၢၼ်ၸႂ်တႄႉ ၵိၼ်ဢမ်ႇလႆႈၼွၼ်းဢမ်ႇလပ်း ႁဵတ်းသင်ၵေႃႈ ဢမ်ႇမူၼ်ႈဢမ်ႇသိူဝ်းလႆႈ ယွၼ်ႉဝႃႈမၼ်းၸဵပ်းၵႅၼ်းဝႆႉၽၢႆႇလဵဝ်ၵူၺ်း။  ဢိင်ၼိူဝ်မီးၵူၼ်းထၢမ်မႃးဝႃႈ တေလႆႈ ငိူင်ႉဝႄႈတၢင်းၵိၼ်သင်ၽွင်ႈ ၼင်ႇႁိုဝ်တေဢမ်ႇႁဵတ်းႁႂ်ႈတၢင်းပဵၼ်မၼ်းႁၢဝ်ႉႁႅင်းၼႆလႄႈ ဝၼ်းၼႆႉႁဝ်းၶႃႈတေ လၢတ်ႈၼႄလွင်ႈငိူင်ႉဝႄႈဢႁႃႇရတၢင်းပဵၼ်ၸွမ်းၼင်ႇၶၵ်ႉတွၼ်ႈပႃႈတႂ်ႈၼႆႉ-

တၢင်းၵိၼ်ဢၼ်ႁဵတ်းႁႂ်ႈႁူဝ်ၶႆႈၽၢႆႇလဵဝ်ထႃႉႁႅင်းၼၼ်ႉ မီး -

1. လဝ်ႈမၢၵ်ႇမႆႉ  ဢၼ်ဢဝ်မၢၵ်ႇဢိတ်ႇႁဵတ်းၼၼ်ႉ
2. တပ်းၵႆႇ ၊ ၼိူဝ်ႉယႅၼ်ႈ၊ လႄႈထူဝ်ႇပိူၵ်ႇၶႅင်
3. မၢၵ်ႇဢိတ်ႇ ၊ ၼဵင်ႈလႄႈၵေႃႇၾီႇ
4. မၢၵ်ႇမႆႉႁႅင်ႈ ၊ ၽွင်ဝၢၼ် (ဢၼ်သႂ်ႇၶဝ်ႈၽၵ်း) ၊ ၶျွၵ်းၵလႅတ်ႉ၊ ထေႃးပၢတ်ႈ၊ လႄႈမၢၵ်ႇၸွၵ်း
5. ဝူၼ်ႉၼမ်
6. ၼွၼ်းဢမ်ႇဢိမ်ႇ
7. တၢၵ်ႇလႅတ်ႇ
8. ယူႇၼႂ်းပိုၼ်ႉတီႈဢၼ်မီးသဵင်လင်
9. သၽႃႇဝလႅၵ်ႈလၢႆႈ မိူၼ်ၼင်ႇၶၢဝ်းမႆႈ (ၶၢဝ်းႁႅင်ႈ) ၼၼ်ႉပဵၼ်ၶၢဝ်းတီႈတၢင်းပဵၼ်ၼႆႉၵႆႉပေႃႇလိူဝ်ပိူၼ်ႈ
10. လွင်ႈလႅၵ်ႈလၢႆႈၼႂ်းတူဝ်ၶိင်းႁဝ်း (ႁေႃႇမူင်း) မိူၼ်ၼင်ႇၼၢင်းယိင်းဢၼ်ၸႂ်ႉယႃႇႁေႉၵင်ႈသၼ်ႇထေႇ