တၢင်းပဵၼ်သီႊၵႃႊၽႄႈထိုင်မိူင်းမၢၼ်ႈယဝ်ႉ ၾၢႆႇပၢႆးယူႇလီၾၢင်ႉ ၼၢင်းယိင်းႁႂ်ႈငိူင်ႉၵၢၼ်ၸပ်းတွင်ႉ ၼႂ်းၶၢဝ်းတၢင်း 6 လိူၼ်

  

တၢင်းပဵၼ်ၸိူဝ်ႉမႅင်းသီႊၵႃႊ (ZiKa) ၽႄႈတိူၼ်းၼႂ်းမိူင်းမၢၼ်ႈယဝ်ႉဝႃႈၼႆ ႁွင်ႈၵၢၼ်လူင်ပၢႆး ယူႇလီၸိုင်ႈမိူင်းလၢတ်ႈ ။

မိူဝ်ႈဝၼ်းတီႈ 27/10/2016 သိုဝ်ႇၶၢဝ်ႇမိူင်းႁူမ်ႈတုမ်မၢၼ်ႈပိုၼ်ၽၢဝ်ႇဝႃႈ – ႁွင်ႈၵၢၼ်ၾၢႆႇပၢႆးယူႇလီ ၵူတ်းထတ်းၺႃးၼၢင်းယိင်းၵူၼ်းၼွၵ်ႈမိူင်း ဢၼ်တိုၵ်ႉၸပ်းတွင်ႉယူႇၵေႃႉၼိုင်ႈၼၼ်ႉ ၸပ်းတၢင်းပဵၼ်ၸိူဝ်ႉမႅင်းသီႊၵႃႊ (ZiKa) – ဝႃႈၼႆ ။

ဢူးသူဝ်းလႃႉဝိၼ်းၸဝ်ႈၼႃႈတီႈႁွင်ႈၵၢၼ်ပၢႆးယူႇလီလၢတ်ႈဝႃႈ – “ ၼႂ်းဝူင်ႈဝၢင်ႈၶၢဝ်းတၢင်း 6 လိူၼ်ၼႆႉ ပေႃးပဵၼ်လႆႈ ၼၢင်းယိင်းဢၼ်ယူႇၼႂ်းဝဵင်းတႃႈၵုင်ႈ ဢမ်ႇပႆႇထုၵ်ႇလီပၼ်ၸပ်းတွင်ႉ ယွၼ်ႉဝႃႈ ၸိူဝ်ႉမႅင်းၼႆႉမၼ်းၸၢင်ႈတုမ်ႉတိူဝ်ႉ လုၵ်ႈဢွၼ်ႇၼႂ်းတွင်ႉသေ ႁဵတ်းႁႂ်ႈၵွၵ်းႁူဝ်လုၵ်ႈ ဢွၼ်ႇလဵၵ်ႉ ႁိုဝ် ဢွၵ်းဢေႃဢမ်ႇတဵမ်ထူၼ်ႈ (microcephaly) ၸိူဝ်းၼႆႉ” ဝႃႈၼႆ ။

ၼၢင်းယိင်းၵေႃႉၼႆႉတေလႆႈဝႃႈပဵၼ်ၵေႃႉဢွၼ်တၢင်းသုတ်းဢၼ်ၸပ်းၸိူဝ်ႉမႅင်းသီႊၵႃႊ ၼႂ်းမိူင်း မၢၼ်ႈ ။ ဢူးသူဝ်းလႃႉဝိၼ်းသိုပ်ႇလၢတ်ႈထႅင်ႈဝႃႈ- “ မိူဝ်းလဵဝ်ၼၢင်းဢၼ်ၸပ်းၸိူဝ်ႉမႅင်းၼႆႉ ဢမ်ႇပၼ် မၼ်းၼၢင်းဢွၵ်ႇႁိူၼ်းတႃႇၶၢဝ်းတၢင်း 2 ဝူင်ႈ ပိူဝ်ႈတေဢမ်ႇႁႂ်ႈၸိူဝ်ႉမႅင်းၼႆႉၽႄႈ၊ ႁဝ်းၶႃႈၵေႃႈၶတ်း ၸႂ်ပၼ်ႁႅင်းမၼ်းၼၢင်းယူႇ ယွၼ်ႉဝႃႈမၼ်းၼၢင်းၼႆႉ မႆႈၸႂ်လုၵ်ႈၼႂ်းတွင်ႉမၼ်းႁႅင်းၼႃႇ”- ဝႃႈၼႆ ။

တၢင်းပဵၼ်သီႊၵႃႊZiKaၼႆႉ ၾၢင်ႁၢင်ႈတေပဵၼ်မိူၼ်ၼင်ႇမီးလူမ်းၼၢဝ်၊ တႃလႅင်၊ ၸဵပ်းၸွမ်း ၼိူဝ်ႉၸွမ်းတူဝ်၊ ဢွၵ်ႇတုမ်လႅင်ၸိူဝ်းၼႆႉ၊ တၢင်းပဵၼ်ၼႆႉ မႃးၸွမ်းယုင်းလၢႆး။ တၢင်းပဵၼ်ၼႆႉ ၽႄတိူၼ်းၼႂ်းၵူၼ်းမိူဝ်ႈပီ 2007 တီႈၼႂ်းမိူင်းဝၼ်းတူၵ်းလႄႈ မႃးၽႄႈတိူၼ်းထႅင်ႈၵမ်းၼိုင်ႈမိူဝ်ႈပီ 2016 မိူၼ်ၼင်ႇတီႈမိူင်းဢမေႊရိၵႃႊ၊ ဢႅပ်ႊၾိၵႃႊ၊ ၼႂ်းၵုၼ်ဢေႊသျိူဝ်ႊ-ပႄႊသိၾိၵ်ႊၸိူဝ်းၼႆႉ ။

ယူႇတီႈႁွင်ႈၵၢၼ်ၾၢႆႇပၢႆးယူႇလီသေ တေႁႃလၢႆးတၢင်းႁႄႉၵင်ႈ ၼင်ႇႁိုဝ်တၢင်းပဵၼ်ၼႆႉ ပေႃးတေ ဢမ်ႇၽႄႈတိူၼ်း – ဝႃႈၼႆ ။

Posted By: ၸုမ်းၶၢဝ်ႇၽူႈတွႆႇႁွၵ်ႈ/သၢႆမွၵ်ႇႁွမ်