ဢမ်ႇထုၵ်ႇလီ ဢွၵ်ႇလဵၼ်ႈႁႅင်း တႃႇပၢႆးယူႇလီ မိူဝ်ႈတႃၼွၼ်းလူႉ ၊ မၢၵ်ႇႁႅင်းၸဵပ်းၵူၼ်ႉၶိုၼ်ႈ ၊ ၵိၼ်လဝ်ႈ (မဵဝ်း Alcohol)

ၼႂ်းၵၢပ်ႈပၢၼ်မိူဝ်ႈလဵဝ်မႃးၼႆႉ ဢမ်ႇဝႃႈ ၼုမ်ႇႁၢႆးၸၢႆယိင်း လဵၵ်ႉၼုမ်ႇထဝ်ႈယႂ်ႇသင် မီးလွင်ႈသႂ်ႇၸႂ်   ၵၢၼ်ဢွၵ်ႇလဵၼ်ႈႁႅင်း တႃႇပၢႆးယူႇလီတူဝ်ၵဝ်ႇတင်းၼမ်သေ ၵမ်ႉၼမ်တေႁူႉဝႃႈ ဢွၵ်ႇလဵၼ်ႈႁႅင်း ၶၢဝ်းလႂ်ယၢမ်းလႂ်ၵေႃႈ မီးၽွၼ်းလီယူႇၼႆလႄႈ ဢမ်ႇၼပ်ႉတေႃႇႁူႉဝႃႈ သင်ဢွၵ်ႇလဵၼ်ႈႁႅင်း ဢမ်ႇမႅၼ်ႈၸွမ်း ၶၢဝ်းယၢမ်း လႄႈ လွင်ႈယူႇလီတူဝ်ၶိင်းၼႆၸိုင် တေၸၢင်ႈတိူဝ်ႉၶိူၵ်ႈ ပၢႆးယူႇလီ တူဝ်ၵူၼ်းႁဝ်းၶိုၼ်း ၼႆယဝ်ႉ။

ၵၢၼ်ဢွၵ်ႇလဵၼ်ႈႁႅင်းၼၼ်ႉ ပဵၼ်ၵၢၼ်လဵၼ်ႈတႃႇလႆႈမႃး ပၢႆးယူႇလီ ပၢႆးၸ်ႂ တူဝ်ၶိင်းၵူၼ်းႁဝ်း ၵႅၼ်ႇၶႅင်မႃး တဵမ်တဵမ်ထူၼ်ႈထူၼ်ႈယူႇ ၊ မိူဝ်ႈၽွင်းၸဝ်ႈၵဝ်ႇ ၼွၼ်းဢမ်ႇဢိမ်ႇ ၼွၼ်းလိုၵ်း တႃၼွၼ်းလူႉ ၊ မၢၵ်ႇႁႅင်း (တီႈတူဝ်) ၸဵပ်းၵူၼ်ႉၶိုၼ်ႈ မၢၵ်ႇႁႅင်းၵႆႈ ၊ ၵိၼ်ဝၢႆႇ ၵိၼ်ပီႇယႃႇ ၵိၼ်လဝ်ႈ (မဵဝ်း Alcohol) ၸႃႉၵႂႃႇၸိူဝ်းၼႆႉသေ ဢွၵ်ႇလဵၼ်ႈႁႅင်းၼႆၸိုင် ႁဵတ်းႁႂ်ႈ တူဝ်ၶိင်း ပၢႆးယူႇလီ ပၢႆးၸႂ် ၶိူင်ႈႁဵတ်းၵၢၼ်တီႈၼႂ်းတွင်ႉ ၵူၼ်းႁဝ်း ဢမ်ႇလႆႈႁပ်ႉၽွၼ်းလီသင်သေ သမ်ႉလႆႈႁပ်ႉၽွၼ်းႁၢႆႉၸႃႉ  ၸူးတီႈတူဝ်ၵဝ်ႇ ၼမ်လိူဝ်ၼႆယဝ်ႉ။

မိူဝ်ႈၸဝ်ႈၵဝ်ႇ ၼွၼ်းဢမ်ႇဢိမ်ႇ ၼွၼ်းလိုၵ်း တႃၼွၼ်းလူႉၼၼ်ႉ ဢမ်ႇထုၵ်ႇလီ ဢွၵ်ႇလဵၼ်ႈႁႅင်း ဢမ်ႇၼၼ် ႁဵတ်းၵၢၼ်ၼၵ်း သေလွင်ႈလွင်ႈ ယၢမ်းၵၢင်ၼႂ်ၸဝ်ႉ (မွၵ်ႈ 02:00 AM ထိုင် 06:00 AM) ၊   ယွၼ်ႉဝႃႈတႃၼွၼ်းၵေႃႈ လူႉပိူင်ၼိုင်ႈလႄႈ ၶိူင်ႈႁဵတ်းၵၢၼ် တီႈၼႂ်းတွင်ႉ တူဝ်ၵူၼ်းႁဝ်းၵေႃႈ ဢမ်ႇလႆႈလိုဝ်ႈႁိူဝ်ႉ တဵမ်ထူၼ်ႈသေ ၸၢင်ႈပဵၼ်ၽေး ၽွၼ်ႉႁၢႆႉ တီႈမၢၵ်ႇႁႅင်း ၊ တူဝ်ၶိင်းၵူၼ်းႁဝ်း  ၸႃႉၵႂႃႇၸိူဝ်ႉၼႆႉ။

မိူဝ်ႈၽွင်း တူဝ်ၶိင်းၵူၼ်းႁဝ်း လႄႈ မၢၵ်ႇႁႅင်း သေတီႈတီႈ ၸဵပ်းၵူၼ်ႉၶိုၼ်ႈယူႇၼၼ်ႉ ၸဝ်ႈၵဝ်ႇ ဢမ်ႇထုၵ်ႇလီ ဢွၵ်ႇလဵၼ်ႈႁႅင်း လႃးလႃး ၊ သင်ၸိူဝ်ႉဝႃႈ ဢမ်ႇဢွၵ်ႇလဵၼ်ႈဢမ်ႇပဵၼ် တွၼ်ႈတႃႇပၢႆးယူႇလီ ၸဝ်ႈၵဝ်ႇၼႆၸိုင် တေၸၢင်ႈလႆႈႁပ်ႉ ၽွၼ်းႁၢႆႉ ၸႃႉမၼ်း  မိူၼ်ၼင်ႇ တူဝ်ၶိင်းၵူၼ်းႁဝ်း လႄႈ မၢၵ်ႇႁႅင်း တေၸဵပ်းၵူၼ်ႉၶိုၼ်ႈႁႅင်း  တိူဝ်းၼႃႇ လိူဝ်ၵဝ်ႇသေ ၸၢင်ႈပဵၼ်ၵႂႃႇၶၢဝ်းယၢဝ်း ၼႆယဝ်ႉ။

မိူဝ်ႈၸဝ်ႈၵဝ်ႇ ၵိၼ်ဝၢႆႇ ၵိၼ်ပီႇယႃႇ ၵိၼ်လဝ်ႈ (Alcohol) ၸႃႉၵႂႃႇၸိူဝ်းၼႆႉယဝ်ႉၼၼ်ႉ ဢမ်ႇထုၵ်ႇလီ ဢွၵ်ႇလဵၼ်ႈႁႅင်းလႃးလႃး လႄႈ လီငိူင်ႈဝႄႈပႅတ်ႈယူႇၼႆယဝ်ႉ ၊ သင်ဝႃႈ ၸဝ်ႈၵဝ်ႇ ၵိၼ်ၼမ်ႉ Alcohol ယဝ်ႉသေ ဢွၵ်ႇလဵၼ်ႈႁႅင်းၼႆ တေၸၢင်ႈႁိူဝ်ႉငၢႆႈသေဢမ်ႇၵႃး ၼမ်ႉ Alcohol ၼၼ်ႉၵေႃႈ တေၵႂႃႇၵိတ်ႇၶႂၢင်ယႃႉၵဝ်း ဢၼ်ပဵၼ်ၶိူင်ႈႁဵတ်းၵၢၼ် တီႈၼႂ်းတွင်ႉ တူဝ်ၵူၼ်းႁဝ်းၼၼ်ႉသေ ၸၢင်ႈလူႉ သုမ်းပႅတ်ႈ ထၢတ်ႈၼမ်ႉၵူၼ်းႁဝ်း။

ေၶႃႈမုၼ်း- မႃးတီႈ တႆးလွတ်ႈလႅဝ်း